الفيديو الإعلاني لمصرف الراجحي ما فيه بطاقة، ولا تطبيق، ولا لوحة شعار في آخره. فيه أزرق بس.
الفكرة في سطر
لون البنك صار اسم الأسبوع.
«الأسبوع الأزرق» بدأ يوم ٢٥ أكتوبر ٢٠٢٦ الساعة ١٠:٤٩ الصبح، بمنشور من حساب الراجحي في X، @alrajhibank: «الأسبوع الأزرق بدأ! عروض لدى أكثر من 180 شريك مع بطاقات مصرف الراجحي 💳». وصفحة الحملة في موقع البنك فيها ١٨٣ عرض، خصومات واسترداد نقدي عند الدفع ببطاقات الراجحي، من ٢٥ لين ٣١ أكتوبر. و١٧٥ عرض منها تنتهي يوم ٣١، و١٥ عرض من ١٨٣ لبطاقات معيّنة بس. هذا حسب رصد قال أدز لحساب البنك وصفحة الحملة ومكتبة إعلانات ميتا، يوم ٢٥ أكتوبر.
وقبل الإطلاق بـ١١ ساعة ونص تقريباً، نزّل الحساب تشويقة ١٥ ثانية نصها «مين اللي باقي ما درى؟ 🤔». والتشويقة ما تكتب اسم الحملة، وكلمة «عروض» ما تجي إلا في سطر الإفصاح الصغير في الزاوية، اللي فيه مدة العروض. والمكتوب فيها بخط كبير «جهّز بطاقتك!» وتاريخ 25/10/2026 بس.
مين اللي باقي ما درى؟ 🤔
المريلة تصير زرقا عند الثانية ٤٫٧
الفيديو الإعلاني الرئيسي ٣١ ثانية، وكله في مقهى: مكينة إسبريسو، وشاب على الكاونتر، وباريستا يصب قهوة. والأزرق يدخل كومضات، وكل ومضة تاخذ شي واحد. كرات اللعبة اللي على الكاونتر عند الثانية ٢، ومريلة الباريستا عند ٤٫٧ وتبقى زرقا لين النهاية. وعند ١٤٫٤ واجهة المقهى كلها تنقلب أزرق، والناس والشارع بألوانهم.
بعدها شبكة ست محلات كل أثاثها أزرق: صالون، ورف ألعاب، ومخبز، ومقهى، ونادي رياضي، ومعرض أثاث. ثم لوحة زرقا: «لا تفوتك عروض الأسبوع الأزرق»، و«شركاؤنا جهزوا لك العروض..»، و«باقي عليك تجهز بطاقتك وتستفيد». والفيديو يخلص على الباريستا يصب حليب في إبريق أزرق، وعلى الكاونتر لوحة صغيرة فيها شارة «الأسبوع الأزرق» ورمز QR.
اسم الحملة ما ينكتب قبل الثانية ١٩، يعني بعد ٦١٪ من الفيديو تقريباً. والبنك نفسه حاضر بعلامة مائية صغيرة في الزاوية، وما فيه لوحة ختامية بالشعار.
أبحاث الفعالية تقول إن تأخير العلامة لآخر الإعلان خطر في زمن الانتباه القليل. والراجحي ما أخّرت حضورها، حطته في اللون. وهذا اسمه أصل مميز، يعني عنصر ثابت تعرف منه العلامة بدون شعار. ونفس الأزرق البنفسجي في المريلة والواجهة واللوحات، وفي شعار البنك على منشورات الشركاء. والبنك يستخدم كلمة «الأزرق» في سلسلة ثانية من قبل الحملة: يوم ٢٤ أكتوبر نشر الحساب عن جوائز «#سبتيات_الأزرق». بس هل المشاهد يربط هذا الأزرق بالراجحي لو شلنا العلامة المائية؟ هذا ما يقيسه إلا البنك.
أربع قصص في ميتا، وشارة كل ساعة في X
في ميتا، لقينا ست إعلانات بدأت ٢٥ أكتوبر، وفيها أربع قصص مختلفة: المقهى بمقاسين، وسوبرماركت فيه رجل بشماغ عند الرفوف وكاشير بكاب أزرق، وصالون أظافر فيه امرأة تضحك ويد تحط لها طلاء أزرق، وقصة ٦ ثواني تنتهي بنفس لوحة التشويقة: «جهّز بطاقتك!».
كل قصة مكان دفع يومي. وهذا الأقرب لنقاط دخول الفئة، يعني المواقف اللي يفكر فيها الشخص بالدفع، عشان تجي البطاقة في باله وقتها. واللافت إن البطاقة نفسها ما تظهر في التشويقة ولا في الفيديو الإعلاني الرئيسي، وما شفناها في اللقطات اللي راجعناها من قصص ميتا. حاضرة في النص بس.
وفي X، من ١٢:٣٠ الظهر، نزل منشور كل ساعة على الثلاثين دقيقة بالضبط. كل منشور بعرض شريك واحد، واللي فحصناها بنفس القالب، وفي زاويتها شارة «الأسبوع الأزرق»: كتلة زرقا بأبعاد ثلاثية، كأنها شعار علامة بحد ذاتها. خمس منشورات لين ٤:٣٠، وكل واحد بين ٣٣ و٤٨ ألف مشاهدة حسب رصد ٢٥ أكتوبر العصر. وفي نفس اليوم طلع اسم الحملة ترند ممول في X، وتحته «Promoted by مصرف الراجحي».
١٠ ملايين مشاهدة، وإعجاب لكل ١٥ ألف
منشور الإطلاق في X وصل ١٠٬٧٣٣٬٦٩٣ مشاهدة و٧٢٤ إعجاب، حسب رصد ٢٦ أكتوبر الساعة ١ الفجر. يعني إعجاب واحد لكل ١٥ ألف مشاهدة تقريباً. والمنشور بشكل بطاقة فيديو برابط لصفحة الحملة، وهذا شكل الإعلان الممول في X. فالأغلب إن أكثر المشاهدات وصول مدفوع، والرقم ما يقيس إعجاب الناس. ونفس الفيديو في يوتيوب ١١٢ مشاهدة.
التشويقة أصغر بكثير، ٢٠٤٬٨٤٦ مشاهدة. بس ردودها ٢٦٣ مقابل ١٤١ إعجاب، يعني ردّين تقريباً لكل إعجاب. السؤال جاب ردود أكثر من الإعجابات.
والطبقة البشرية جات كلها من برا حساب البنك. ما لقينا مؤثرين ولا شراكة رسمية ولا كواليس. بس حساب عروض نشر قائمة العروض قبل التشويقة بدقايق، يعني الجواب طلع قبل السؤال. وفي ردود منشور ثاني للبنك يوم الإطلاق، عملاء ينشرون لقطات رسائل استرداد نقدي.
والأهم إن ثلاث شركاء على الأقل يعلنون في ميتا من صفحاتهم باسم «الأسبوع الأزرق»، وواحد منهم بدأ ٢٢ أكتوبر، قبل إطلاق البنك بثلاث أيام. يعني الاسم صار موسم يدخله غير الراجحي.
والموعد قبل موسم الجمعة البيضاء في نوفمبر. و١٧٥ عرض تخلص ٣١ أكتوبر. والاسم نفسه مو جديد، حساب البنك نشر عروض «#الأسبوع_الأزرق» في أكتوبر ٢٠٢٥. فالحكم في المواسم الجاية: إذا الشركاء كملوا يكتبون الاسم على عروضهم من صفحاتهم، صار للراجحي موسم تملكه. وإذا بقي الاسم في إعلانات البنك بس، يبقى أسبوع عروض بلون مميز.
تحديث ٢٨ أكتوبر ٢٠٢٦: عدّلنا وصف الشارة والختام، بعد ما لقينا عروض الأسبوع الأزرق في حساب البنك من أكتوبر ٢٠٢٥.
