كثير من المشاريع وأصحاب الأعمال يتعاملون مع المحتوى على إنه حشو منشورات، وعدد لازم ينزل كل شهر.
ومن أكثر الأشياء اللي واجهتها في شغلي، مع احتكاكي الكثير بأصحاب الأعمال، إن التركيز يروح للكمية. كم بوست بننزل؟ وكم ريلز بنصور؟ بدل ما يكون السؤال: وش القصة اللي نبي نسردها للجمهور؟ وليش المفروض يهتم ويتابعنا؟
البطل هو المشروع
من خلال تجربتي في السوق، صرت أشوف المحتوى على إنه مسلسل، والمشروع نفسه هو المسلسل وبطل القصة كاملة.
والمسلسل له شخصيات وهوية وموسيقى، ولحظات درامية وأحياناً كوميدية، وأحداث وتطورات تخلي المشاهد متحمس يعرف وش بيصير في الحلقة الجاية.
صاحب المشروع هو صاحب القصة، والمنتجات والخدمات شخصيات فيها. والموظفين والعملاء والمواقف اليومية كلها جزء من أحداث المسلسل. وحتى التصوير والكلام والموسيقى والألوان تصنع هوية يتعرف عليها الجمهور بمجرد ما يشوف المحتوى.
وكل يوم فيه حلقة جديدة، مو شرط تكون إعلان أو عرض مباشر. ممكن تكون موقف، أو قصة، أو معلومة، أو تجربة من داخل المشروع.
وكل هذا الكلام عملي واستراتيجي بحت. المحتوى بالنسبة لي مو مجرد وسيلة نعبّي فيها حسابات التواصل. هو أداة أساسية لبناء علاقة الجمهور بالعلامة التجارية على المدى الطويل، وأحد أصولها المهمة.
خطة الشهر أقصر من العلاقة
وفيه دراسة قريبة من هالفكرة، على الإعلانات المدفوعة. في أكتوبر ٢٠٢٤ نشر معهد ممارسي الإعلان في بريطانيا IPA دراسة سوتها System1 من بيانات المعهد، على أكثر من ٤ آلاف إعلان تلفزيوني لـ٥٦ علامة. والعلامات الأكثر ثباتاً في إبداعها، اللي تحافظ على فكرتها وعناصرها من إعلان لإعلان، سجّلت حملاتها «أثر كبير جداً على العلامة» أكثر بـ٢٧٪.
والأثر ما وقف عند العلامة. أعلى ٢٠٪ في الثبات سجّلوا «أثر كبير جداً على الأعمال» أكثر بـ٢٨٪. وجودة إعلاناتهم نفسها، بمقياس System1، كانت ترتفع كل سنة، والأقل ثباتاً ما تحسنت إعلاناتهم.
ولو قسمنا ٤ آلاف إعلان على ٥٦ علامة، يطلع أكثر من ٧٠ إعلان لكل علامة في المتوسط، على افتراض إن التوزيع متساوي. فالعلامات في الدراسة تنتج كثير في المتوسط، والفرق اللي قاسته الدراسة هو الثبات.
والدراسة نفسها تقول إن الثبات مرتبط بالأثر، مو إنه سببه. وهي على إعلانات تلفزيونية مدفوعة، مو منشورات في الحسابات. وتنبّه إن العلامات لازم تضبط الأساس قبل ما تعتمد على الثبات، فالثبات ما يغني عن الأساس: تموضع واضح وفكرة ثابتة.
وفي أبحاث الفعالية وزن للمدى الطويل بعد. Les Binet وPeter Field، في تقريرهم «The Long and the Short of It» اللي نشره IPA في ٢٠١٣، لقوا إن أفضل توزيع لميزانية الإعلان كان تقريباً ٦٠ لبناء العلامة و٤٠ للتفعيل، وهو الإعلان اللي يبي بيع قريب.
وفي تقريرهم «Effectiveness in Context» سنة ٢٠١٨ صارت ٦٢ و٣٨، والخلاصة بقت نفسها: المهم التوازن بين التواصل الطويل والقصير. وPeter Field يوصف اللي صار بعدها بـ«موجة تفعيل» ارتفعت، والفعالية نزلت معها.
وفي تقرير ثاني لهم مع LinkedIn B2B Institute، لقوا إن الرسائل العاطفية أكثر فعالية على المدى الطويل، والعقلانية أكثر فعالية على المدى القصير.
والنسب هذي لميزانيات إعلان مدفوع، ومتوسطات تتغير من فئة لفئة، والتقرير الثاني على شركات تبيع لشركات. فما تنطبق كأرقام على خطة محتوى، بس فكرة التوازن نفسها تنطبق.
وهذا تحديداً المفهوم اللي كنت حريصة أغيّره من أول ما بدأت وكالة ناروما للتسويق. والحمد لله، خلال السنوات الأخيرة قدرت مع فريقي نبدأ نغيّر طريقة تفكير بعض المشاريع في المحتوى، وننقلها من مجرد النشر إلى صناعة قصة.
والفكرة إننا ما نبي الجمهور يشوف المنشور وينتهي الموضوع. نبيه يرتبط بالقصة، ويتعرف على الشخصيات، وينتظر وش بنقدم له بعدين.
الأرقام والدراسات في المقال أضافها فريق تحرير قال أدز، واعتمدتها الكاتبة.
عن الكاتبة




