«الشتاء» كلمة كتبتها ثلاث علامات في إعلاناتها مع أول نوفمبر، وكل وحدة تبيع تحتها شي ثاني.

العلامات الثلاث سنتربوينت وSTC Bank والشياكة. رصدنا حساباتها في إنستقرام وصفحاتها في مكتبة إعلانات ميتا يوم ٥ نوفمبر ٢٠٢٦. سنتربوينت بدأت إعلاناتها الممولة ٣١ أكتوبر، وSTC Bank بدأت ٢ نوفمبر، والشياكة ٣ نوفمبر.

عند سنتربوينت، الشتاء اسم حملة: «أينما كان الشتاء». الفيديو الإعلاني الرئيسي نزل في إنستقرام ٢ نوفمبر. فيه ناس من كل الأعمار يمشون في شوارع مدينة بمعاطف وقبعات صوف، وطفلة تفتح جريدة مكتوب عليها اسم الحملة. وما فيه سعر ولا شعار، ولا قطعة معروضة باسمها. البيع كله في الكابشن، اللي يقول إن التشكيلة متوفرة في متاجرها وأونلاين.

@centrepointme، الفيديو الإعلاني الرئيسي «أينما كان الشتاء»، ٢ نوفمبر ٢٠٢٦

أما إعلاناتها الممولة الثلاثة في ميتا، فتاخذ لقطات من نفس الفيديو، وتحط الشعار والموقع في آخرها، ونصها «توقعات اليوم: إطلالة شتوية تستاهل الطلعة». يعني البيع راح للنسخ القصيرة. وهذا منطق Binet وField في تقسيم الأدوار بين بناء العلامة والتفعيل، وما نعرف كم صرفت سنتربوينت على كل جزء. ويوم ٤ نوفمبر نزّلت ريل كواليس من تصوير الحملة. وآخر ريل نزل نفس اليوم كتب اسم الحملة بالعامي في الكابشن: «وين ما يودّيك الشتا.»

عند STC Bank، الشتاء ختم. «هب الشتاء» في إطار أبيض، وتحتها «بعروووضه» على أخضر. يطلع في زاوية كل تصميم، والتصاميم كلها داخل نفس الخيمة: ستارة مفتوحة على رمل وغروب، وسجادة حمرا. والخيمة تجيب الكشتة للصورة بدون ما تنكتب الكلمة.

وما فيه تصميم يتكلم عن منتج البنك نفسه. كل بطاقة خصم عند شريك، بشرط تدفع ببطاقات STC Bank، مثل منشور ٢ نوفمبر: «خصم 15% من "نايس ون" مع بطاقاتنا». وفي إنستقرام، نزل الختم على ٤ منشورات من ٢ نوفمبر، ومعها ٣ إعلانات ممولة في ميتا. والختم يتكرر بنفس الشكل في كل تصميم، جنب شعار البنك. ولو استمر، ممكن يصير أصل مميز.

وفي تيك توك، نشرت STC Bank فيديو «هب الشتاء بعروضه» يوم ١ نوفمبر، وانعرض ممول ووصل ١٫٥ مليون مشاهدة. وفيديو ثاني من نفس الحساب يوم ٣ نوفمبر، كابشنه «هب الشتاء بعروض بطاقاتنا»، نزل بدون ترويج ووقف عند ٧٢٤ مشاهدة، حسب رصدنا يوم ٥ نوفمبر.

@stcbank_ksa، «هب الشتاء وجاب معه عروض بطاقاتنا»، ٥ صور، ٢ نوفمبر ٢٠٢٦

الشياكة في شتاءين بنفس الأسبوع

إعلان STC Bank الممول اللي بدأ ٢ نوفمبر فيه سبع بطاقات لستة شركاء، والسادسة للشياكة: «خصم 15% في فروع الشياكة» بالكود STCB وكل بطاقات البنك، من ١ نوفمبر لين ٣١ ديسمبر ٢٠٢٦. ومكتوب تحتها «يسري الخصم على منتجات محددة»، يعني مو على كل القطع.

بطاقة خصم ١٥٪ في فروع الشياكة من إعلان STC Bank «هب الشتاء»
بطاقة الشياكة في إعلان STC Bank «هب الشتاء بعروضه» · من صفحة STC Bank في مكتبة إعلانات ميتا، نشط من ٢ نوفمبر ٢٠٢٦

وفي نفس الأسبوع، الشياكة تنشر شتاءها هي من حسابها. صورة ٣ نوفمبر لرجل بثوب رمادي وسديري يجر شنطة سفر، ومكتوب عليها «دفء الشتاء بفخامة الشياكة»، والكابشن يختم بـ«خلّ شتاك على هواك». وريل ٤ نوفمبر لجاكيت صوف، كابشنه يقول «خامة تمنحك الدفء». وإعلانها الممول نصه يبدأ بـ«تشكيلة الشتاء من الشياكة»، وفي آخره «الكمية محدودة».

@alshiaka، صورة «دفء الشتاء بفخامة الشياكة»، ٣ نوفمبر ٢٠٢٦

والشياكة تتكلم عن الخامة والدفء، يعني عن القطعة نفسها.

إعلان الشياكة «تشكيلة الشتاء من الشياكة» · من صفحة الشياكة في مكتبة إعلانات ميتا، نشط من ٣ نوفمبر ٢٠٢٦

فاللي يبي ثوب أو سديري من الشياكة هالشتاء ويدفع ببطاقة STC Bank، له ١٥٪ في الفروع لين ٣١ ديسمبر، بس على منتجات محددة.