الأرقام الكبيرة ما تنحس. ٩٦٬٦٠٠ متر مربع رقم صحيح، بس أغلب الناس ما يقدرون يشوفونه في راسهم. والمراعي عارفة هالشي، فكتبت في X يوم ١٢ أكتوبر: «لأن حجم مساحة مصانعنا صعب تخيّله، سهلنا عليكم الخيال».
لأن حجم مساحة مصانعنا صعب تخيّله، سهلنا عليكم الخيال #المراعي
عشر ثواني في ثلاث لقطات
الفيديو بدون كلام، وفيه موسيقى بس. يبدأ بلقطة جوية لشبكة ملاعب بادل زرقاء ما لها آخر. تتجمع قدام الكاميرا كور ومضارب، وبعدها تتفرق ويطلع النص: «تخيّل! 485 ملعب بادل». بعدها لقطة حقيقية من خط الإنتاج، صفوف معجنات ذهبية، والنص: «تعادل مساحة مصانع مخبوزات المراعي». ويختم بلقطة جوية للمجمع في الصحراء، و«96,600 متر مربع».
حسبناها وراهم
ملعب البادل النظامي ٢٠ متر في ١٠، يعني ٢٠٠ متر مربع. ولو قسمنا مساحة المصانع عليه يطلع ٤٨٣ ملعب، على افتراض إن الملاعب لاصقة في بعض بدون ممرات. يعني رقم المراعي قريب من حسابنا، والفرق ملعبين بس. المقارنة صادقة، وما فيها مبالغة دعائية.
الذكاء الاصطناعي سوّى اللي ما تقدر عليه الكاميرا
ملاعب البادل مولّدة بالذكاء الاصطناعي، وإنستقرام حط على الريل وسم «AI content». بس المراعي ما استخدمته بدل التصوير. المصنع والمعجنات لقطات حقيقية، والذكاء الاصطناعي سوّى الشي الوحيد اللي ما تقدر عليه الكاميرا: يصف مئات الملاعب جنب بعض عشان تقارن. واختيار البادل بالذات موفّق، لأنه ملعب يعرف شكله وحجمه كثير من الناس هنا، أكثر من ملعب الكورة أو الهكتار.
الرقم ياخذ ثانية ونص
الملاحظة الوحيدة على التنفيذ: الرقم «485» يبقى واضح على الشاشة حوالي ثانية ونص، من الثانية ٣٫٣ لين ٤٫٩. وقبلها الكور والمضارب تغطي النص وهي داخلة. وفي فيديو ينشاف وأنت تمرر، الرقم اللي عليه الفكرة كلها يستاهل وقت أطول.
منشور، مو حملة
الفيديو نزل في X وإنستقرام بس، وما لقينا له إعلان ممول في مكتبة ميتا لين ١٣ أكتوبر. وفي X جاب ٤٬١٧٣ مشاهدة حسب رصد ١٢ أكتوبر، و٢٦ إعجاب يوم ١٣. يعني هو منشور في حساب العلامة، مو حملة بفيلم ونسخ وناس يكملونها.
والفكرة تستاهل أكثر من منشور. عند المراعي مصانع ألبان وعصائر ومزارع، وكل وحدة منها رقم كبير ينتظر مقارنة تقرّبه.
